SEKEDAR MENGISI WAKTU "Ghi ba'a bisuak tempo kan?" tanyo Jisidi ka Yakma'ah sudah makan malam. "Iyo. Kalender merah" jawek Idar, anak eah, sambie melingkuk-an siso tulang sudah makan daghi pinggan ka wadah makanan kucieng. Makan malam di palantea, basamo-samo, ditoghangi lampu cimporong.
"Dikoghingi lah tobek bawah longgea pek Baghuah Baghangan. Lah godang-godang kan-tawi jo kan-taweh mpak dek den belok lalu!"
"Jadih mlah. Dibao ka kan-komih. Lai pangkugonok gak nyereah!" manjowob YakMa'ah, sambie mancaghi-caghi kampie tompek sighieh jo pinang, saroto sodah, bawah lamaghi makan, ampieng lutuk suok.
"Yo ancak pulo reah. Sambie maisi kotu tempo nak-ughang keah. Dibao nasi jo samba, gulai gak sangenek. " tambah Misur, laki Idar. Mandongea rencana apak, ibu jo uwo ajak itu, lah kombang ghabu paja nan batigo; Buyuang Godang, Buyuang Tongah jo Supiek Erma. Tabayang, bisuak pagi manangkok ikan, banyak bona, dalam tobek godang, .... Matoaghi mulai tinggih. Jisidi jo kaluarga eah lah baighieng-ighieng madok ilie. ka tobek baghuah-baghangan. Indak lamo, lah tibo pek pamatang, sasudah manughun tobieng, malinteh jalan tunggua kaghambie. Langsuang dimasuak-i tobek bolah pamatang bawah, dicaghi pambuluah tunggang, diegang pokok- eah. Byuuurrr!!! mamancea aie ka sawah bolah bawah. Pas satontang pangka pambuluah tunggang, lah baputea-putea aie, cucuk-kolieng! Ndak lamo, lah susuk aie. Lah nampak pungguang ikan. manggalitea-galitea ateh lunau. Ikan tawi, ikan omeh, ikan paweh bahkan ikan pantau. banyak!
Jisidi jo YakMa'ah mangumpua-an ikan sado nan dapek tatangkok. Idar jo Misur bitu pulo. Buyuang Godang Jo Buyuang tongah, lai soto tapi kadang sambie main-main. Salieng mamanggak-an ikan nan dapek. "Ha, godang eah lai!" "Tengok niak. Panjang!"
Tagieh mamogangan ikua ikan, sudah tu ba tengok-an ka Supiek nan togak ateh pamatang. Supiek lun bulieh masuak tobek lai. Takuk kok takubua kaki paja ,dalam lunau, nambah kojo ajo!
Buyuang Tongah, kan sangajo malotak-an ikan nan dapek pek ampieng kaki Supiek. Lah mancangkuang pulo supiek ma-awai-awai ikan. Tambah lamo, tambah datang somuk api. A lah tapokiek Supiek, jaghi kaki eah digigik somuk sighah.
"Masuak pulo lah den dih Bu!" Supiek maghegek.
"Jan lai! Dalam. Tabonam kau biko!"
"Pek topi inyak ajo. Lai dangkek. Nyokau ikan pantau..." pintak Supiek. Dek ibunyo indak manjawek, nyo lah ngalucuh ka dalam. sambie mamogangan sayak. Managkok ikan pantau, ciek....duo......tigo! Sonang bona ati Supiek.
Weh, tu ikan paweh tu ha! Ateh lunau! Supiek bajalan agak ka tongah. Jo lambek-lambek, di cokau-eah ikan paweh cako. Snap! Dapek!! Tapi lincie! Paweh manggaletek laghi! Ikua ikan reah maompeh-ompeh ka lunau. dan, pcrrk....oman muko Supiek, ponuah dek titiek-titiek kalabu, lunau tobek!
Copek Supiek manggesek jo longan eah. tapi malang, lunau pek pipih, makin diapuh, makin marato ken-kaniak! Bahkan bintiak aluh kosiek lunau, masuak ka mato....
"Ngeaaakkkk!!!" managih kasudahannyo Supiek. Mato eah podieh. Lah takojuk Misur jo Idar. Buyuang Godang jo Buyuang Tongah malengong pulo ka adiek eah. Ba'a jak eah?
"Mato kalimponan lunauuuuuu,..uuu...uuu" manangih Supiek. Idar copek mambasuah tangan. Di dukuang paja ka pamatang. Di lap mato jo muko nan balunau. Diombuh. Wuuuh!!! Sakali. Ombuh baliek. Wuuuuhh.... Duo kali. "Olah ondo?"
Supiek mangijok-ngijok-an mato.
"Olaaah..." nyinyo, sambie mambuduk.
"Kan cako den kecek-an lai, tapi tanggege!"
Buyuang Tongah mamandangi ajo , adiek eah ditolong ibu eah. Pek ateh pamatang. Eh, tengok eten! Arah ka tobieng ilie longgea, ado pulasan babuah! Sighau!! Lobek!! Ghondah-ghondah!!
Buyuang Tongah langsung kaluea daghi tobek. Naiek ka pamatang. Basuah tangan stek. Ntu ilang, arah ka bawah batang pulasan lobek! Sssssttttt.
